تفسـير تـراك الـأوضـة بـرودكـشن | el2oda production

تفسـير تـراك الـأوضـة بـرودكـشن  

ان كنت يا شهريار بعت بالادب المسيره ..
وجعلت صياح ديك يمنعك عن السكينه
أنا للادب امسكها
فويلك يا شهر زاد .. لن تبقى الليلة على فراشى طويلا
" لو شهريار أديب .. مكنش ساب الديك .. كان قتله "
لو كان شهريار هو الطرف المنتج للأدب .. مكنش هيحتاج لـ شهر زاد ..
وكان قتل الديك اللى كان بيمنعه عن قتلها..
فـ هنا بيقوله لو كنت انت عشان محتاج أدب شهر زاد بعت مسيرتك ..
وخليت صياح الديك يمنعك عن السكينه ..
" فـ انا لـ الادب أمسكها "
هنا ليها معنين : ان الجوكر ماسك السكينه للأدب نفسه .. يعنى هو ممك يقتل الادب نفسه .. بحكمـ انه زى هيقول تحت " معاه عصا الكتابه " فـ " بشق السطر وارسمـ الطريق لـ بيت القصيد " يعنى متحكمـ فى الادب .. معاه عصا المعجزه .. اللى هتاكل كلمات باقى الكتاب .. زى ما عصاية موسى أكلت تعابين السحره ..
المعنى التانى : ان ماسك السكينه لـ كل شهر زاد عشان الادب .. لأن هو مش محتاجها اصلا .. بالعكس موتها مش هيفرق معاه فـ حاجه فـ ويلك شهر زاد " لن " تبقى الليلة على فراشى طويلا .. مش هستناكى زى شهريار ألف ليله عشان " اتشبع منك بالادب والقصص " لأ انا مش محتاج اصلا ..
هما اللى خافوا زمان فقالوا لـ موسى حارب انت وربك ..
دلوقتى احنا اللى بندعى نفس الرب بـ نفس النبره ..
- عن اليهود " وراعو وجه الشبه فى تطبيق المعنى على اشباههمـ فى الوقت الحالى اللى بينكروا وجود المعجزه "
قاصد ان زمان لما قالوا لـ سيدنا موسى " فى قصة العماليق "
" قَالُوا يَا مُوسَىٰ إِنَّا لَنْ نَدْخُلَهَا أَبَدًا مَا دَامُوا فِيهَا ۖ فَاذْهَبْ أَنْتَ وَرَبُّكَ فَقَاتِلَا إِنَّا هَاهُنَا قَاعِدُونَ "
قالوله حارب انت وربك .. احنا ضعفاء .. وعايزين ربنا يحارب مكانهمـ ..
فـ احنا دلوقتى بندعى نفس الرب دا .. بـ نفس النبره ..
دلوقتى احنا بردو عايزين ربنا يحارب مكانا .. بدل ما نحارب اليهود ..
واقفين مكانا .. مبنتحركش ..
اتقابلنا قبل كدا .. لكن فى زمن غير زمننا ..
نفس عيونى وعيونك .. اللى اتغيروا أجسامنا ..
كتبت قبل كدا بس احتمال سطورى كانت اضعف ..
بعيد صياغة فكره .. مش بنت النهارده ..
" انا القصيده دى اللى الشرق من زمان ماسكها "
أول مره هقول الفكره دى .. " بس الجوكر قالها قبل كدا ع الاسك "
الكلامـ ان الجوكر جواه احساس انه اكبر من الزمن اللى عاشه ..
بالتالى حاسس انه كان موجود فـ زمن ما بـ شكل او بـ اخر ..
وكان كاتب بردو .. فـ بيقول للكتابه .. اتقابلنا قبل كدا .. بس فى زمن تانى ..
شايفين بنفس الطريقه " عندنا نفس الرؤيه "
اللى اتغيروا أجسامنا .. اشكالنا .. ان كان هو ولا الكتابه ..
كتبت قبل كدا .. بس احتمال قبل كدا سطورى كانت اضعف ..
فمكنتش بنفس شكلى دلوقتى ..
بعيد صياغة فكره جوايا من زمان مش لسه وليدة اللحظه ..
غريبه .. لاقيت مكانى .. فـ كوكب عمره ما كان مكانى ..
لو فى واحده احلى منك .. هتكون انتى فـ زمن تانى ..
بـ غير نجومى مهتديش .. بيك يا منطق .. مش هتربط ..
شيل حسابك .. مش هسيب بنتى تتصلب ..
" كاره كوكبكمـ مش لأنى فـ كوكب أحلى "
" دا بقى يفرض علينا معنين "
ان احمد يكون بيتكلمـ عن كوكب الارض ..
فـ يقول ان لقى نفسه ع الكوكب دا .. بس عمره ما كان حاسس انه مكانه او يشبهله ..
او انه يبقى بيتكلمـ عن الكوكب اللى خلقه لنفسه أو فى خياله .. فـ بيقول ان رغمـ ان مكانه على كوكب الارض .. الا انه لقى نفسه مرتبط بـ كوكب تانى ..
فـ انا مش هجبر نفسى انى اعيش زيكمـ فـ هـ أهتدى بـ أفكارى بس .. ومش هتكتف بالمنطق .. هعيش حر ..
شيل حسابك " زى ما بنقولها بالعاميه كدا .. اتحمل مسئولية نفسك .. او اتحمل اللى انت عملته وكدا .. " مش هسيب الكتابه تتعذب ..
ايوه انا المجنون صاحبها ياللى بتتعرفى ..
نضفى .. من فضلك الافيه وابقى استظرفى ..
قومى بينا نمشى من المكان دا مش هتأقلم ..
متخليناش نتقابل وسط زمايلك تانى من فضلك ..
" الكلام له شكلين "
اما لينا كـ جوكريانز : فـ هيبقى بيكلمـ الاغبيا اللى بيقولوا علينا وعليه مجانين ..
بيقولهمـ ايوه انا المجنون ياللى بتتعرفوا عليا .. انضفوا الاول وبعدين ابقوا اتكلموا عنى ..
وبعدين يرجع يوجه لينا الكلامـ " يالا نمشى من وسطهمـ مش هتأقلم على وجودهمـ .. متجيبونيش تانى ليهمـ .. او متخلونيش اختلط بيهمـ "
أو بيكلمـ الكتابه : زمايلها هما " اى حد بيكتب " وبيقول عليه مجنون ..
بيقولها انه مش عايز يقابلها معاهمـ مش عايز يختلط بيهمـ ولا يجتمع بيهمـ فى مكان ..
مش هيتأقلمـ ..
انت مش اول كاتب يضرب موناليزاتى فـ مقتل ..
بـ أرثى أفكار مبعوتالى ماتت على ورقتك ..
اللى اسمه عمق دا اكتشافى ياريت تفوقوا بقى
مدفون فى عقلى موناليزات .. فـ اطرش بترول يا مكن ..

بيوجه الكلامـ لـ كاتب .. انت مش اول كاتب يضرب موناليزات الجوكر فـ مقتل .. أو يهين الكتابه .. كل الأفكار اللى مبعوته للجوكر .. لما الكاتب دا حب يقلدها .. ماتت على ورقته .. فـ الجوكر بيرثيهاا .. " والرثاء هو نوع من انواع الشعر .. يتم فيه تعداد خصال الميت وصفاته "
اللى اسمه عمق دا اكتشاف الجوكر .. فوقوا " مش هتعرفوا تقلدوه "
مدفون فـ عقله موناليزات .. فـ اطرش بترول يا مكن ..
" نظريات الاصل البيولوجى كلها بتقول ان البترول بينتج من بقايا الكائنات الحيه .. اللى بتتحلل بـ واسطة البكتيريا اللاهوائيه .. وبعد فتره طويله من الزمن .. بتتحول بفعل الضغط والحراره لـ بترول " - ودا بيرجح الكلام اللى قولناه فوق عن احساسه انه عايش من زمن طويل "
الموناليزات هى الافكار .. اللى أنتجت البترول اللى خرجه الجوكر للمكن اللى بيدور بالبترول دا ..
" اغلب تكوين اللون اللى جمل لوحة رابكو كان بريشة عمو الجو "
ان كل الراب شغال على الافكار اللى خرجت من الجوكر .. اللى من غيره عقولهمـ هتقف .. " المكن مش هيدور "
الاوضه بروداكشن عمر دراعى دا ما اتلوى
مستقيمـ بهديكوا الاكسجين يبيعوا بقيت الهوا
أكبر عدد من الافكار فـ اصغر عدد جمل ..
دول 100 جرامـ متستقلش بـ اربع ذُنب

" الاوضه بروداكشن " بروداكشن يعنى انتاج .. انتاج اوضته يعنى ..
عمر دراعه ما اتلوى بـ فلوس انتاج .. هو بيسجل وينتج ويهندس فـ اوضته ..
بيهدينا الاكسجين خالص .. وهما بيبعوا بقيت الهوا " مكونات الهوا ثانى اكسيد الكربون وهكذا " اللى تعتبر مميته لوحدها بدون الاكسجين " هما بقى بيبعوه بفلوس ..
اما هو بيدينا الاكسجين " سر الحياه " بدون فلوس .. وبدون مقابل ..
بيدينا اكبر عدد من الافكار فى اصغر عدد من الجمل ..
" بتمادى كل مدى اوفر دوز الجرعه زياده "
دول 100 جرامـ .. لو خدت 100 جرامـ من الهيروين " متهيألى دى جرعه كبيره "
بس متستقلش بـ اربع ذٌنب " اللى بنسميهمـ احنا مقالب يعنى .. متستقلش .. باللى حصله فى حياته يعنى .. او أى اذى نفسه ..
جمله بـ معانى متنتهيش ..
عجزت بدرى فى تلات سنين ..
دا غير اللى ضاع مش ع الطريق ..
انتى الادمان .. مش الهيروين ..

" جمله ليها معانى مش هتنتهى كل ما تفكر هيطلع معنى جديد .. عمره جرى بسرعه فى خلال تلات سنين .. غير اللى ضاع منه لحد ما وصل ..
فـ بيقول للكتابه .. انتى الادمان نفسه .. انتى الاساس .. مش مجرد مخدر ..
انتى وهى فيلمـ وقصه بيحكوا " نفس الحاجه "
مفيش تالت يدينى نفس هرمون السعاده ..
بعيش معاكى فكرة احلى جمله اعرف اكتبها ..
اى حاجه اضعف من ابتسامتك .. سهل عليا اوصفها ..

لو رجعنا لـ تراك نفس الحاجه لما فسرناه .. وقولنا انه بيكلمـ الكتابه وبيكلمـ مصر ..
الكتابه والوطن .. مفيش حاجه تالته بتقدر تسعده
بيعيش مع الكتابه فكرة احلى جمله يعرف يكتبها " بيتحدى نفسه "
ومع الوطن .. اى حاجه اقل جمال من وطنه سهل يوصفها ..
" مش هقدر امشى منها مدى كلمه للأميره "
وممكن نقول انه بيكلمـ " بنتين " فـ حياته ..
واحده بتمثل العقل وواحده بتمثل الحب
فـ الاتنين بالنسباله هرمون السعاده ..
باعد شياطينى .. عنك ياللى ملكتينى ..
اغلب الاحيان بـ نبرة احمد بس بتسمعينى ..

لو قولنا بيكلمـ الكتابه " من امتى شيطانا ادانا غير اللى نؤذى بيه اللى اذانا "
فـ هو باعد شيطانه عن الكتابه وبيكلمها كـ احمد
لو قولنا الكلام موجه لـ بنت " باعد عنها الجوكر وقريب لها بـ احمد "
بقولك ..
احرق نيكوتين .. بعد ما غلوا النيكوتين ..
روح مع صاحبك قابلوا الناس اللى هيضربولكوا فيزيتين !
بعد كدا بيوجه الكلامـ للجمهور .. احرق نيكوتين بعد ما غلوه عليك .. والحق سافر
الحال هيبقى اسوأ ..
شاغل ظلمـ الفراعنه يوسف عن ظلم مش ناسيين
واقف سجنه فى مصر بينه وبين اخواته فى فلسطين
أنا كاره اليهود بـ ضعف ايمانهمـ قوم جبان ..
افتكروا بلاد العماليق لما بقوا العماليق اقزام

بعد كدا بيوجه كلامه للى طلبوا منه تراك لـ فلسطين ..
فبيقولهمـ احنا مش ناسيين .. انما ظلم فراعنة مصر لينا ..
واقفين بينا وبين اخواتنا فـ فلسطين ..
زى ما كان عزيز مصر ساجن سيدنا يوسف وواقف بينه وبين رجوعه لـ اخواته .
هو كاره اليهود من زمان .. جنس جبان .. مفتكروش بلاد العماليق .. غير لما بقوا العماليق اقزامـ .. برغمـ انهمـ رفضوا يحاربوهمـ فى البدايه ..
ما علينا ..
الفرق بين الزمان والزمن وضحته ..
فأنتى فاهمه لغز فاء التعقيب " اللى قبل اطرش
"
" الفرق بين الزمن والزمان " فرق المحدثون بين الزمن والزمان .. بـ طريقتان .. فـ قيل ان الزمن لـ " الوقت السهل " والزمان .. لما طال منه وصعب ..
وقيل ان الزمن تعبير لغوى اما الزمان مقياس فلسفى ..
وقيل ان الزمن جاءت فى القرأن لـ تشير لـ حقبه معينه ..
اما الزمان .. فـ جاءت كـ " دهر " مده غير معلومه كـ الابد ..
لو طبقنا الكلام دا " هنلاقيه بيفسر الكلامـ اللى فوق بتاع انه عايش من زمان ودا ادى لتكون الافكار زى ما بيتكون البترول " اللى هو حاليا الحاجه الاساسيه فى الدنيا ..
" استوعبوا أوجه الشبه "
- الكلامـ دا بين الجوكر وأحمد -
لذيذه وعميقه تشبيهاتى بالبيسه ..
مسيبش أكلة مانجه خليك انت فى برستيجك
مش ساكت .. دا ردى ع الغنوه اللى فاتت
بتهجمـ فترة انسحابى وتنسحب لما ابقى شادد ..
عايز تبقى قزم منهم بس بشكل اخر ..
تاخد واحده من كوكبهمـ وتخليها مراتك ؟

ركزوا هنا بقى قوى .. عشان هنشرح الكلامـ " حرفى "
وبعدين نطبقه بـ عمق الفكره ..
الجوكر بيقول لأحمد : تشبيهاتى بتبقى عميقه لما بشد بودره .. فـ مش هتخلى عنها .. خليك انت فى برستيجك بقى ..
انت قولت اسكت " فـ تراك اسكت " مش ساكت ودا ردى عليك ..
بتيجى فى فترة انسحابى وانا ضعيف يعنى .. وتهرب لما ابقى شادد بودره عشان ببقى اقوى منك ..
عايز تبقى زيهمـ بس بشكل تانى .. فـ هتاخد واحده زيهمـ وتخليها مراتك !
ناخدها بـ عمق الفكره بقى !
الجوكر بيقول لـ أحمد تشبيهاتى بتبقى لذيذه وعميقه بأدمانى للكتابه مش هفوت حاجه بحبها عشان انت خايف على برستيجك .. لما مثلا قال لولا انك ادمنت نفسها كان زمانك بودرجى .. واهى بعدت ابعد من ابعد حباية بى فى السطر .. فـ طبعا ممكن نقول اشمعنا شبه بالمخدرات ! .. فـ كدا التشبيهات أفضل واعمق .. مش هخاف على برستيجى بقى وكلام الناس وكدا ..
وانت يا احمد مقولتش اسكت غير فى وقت يأسى لما قولت مش عايز اكتب .. وتنسحب لما ابدأ اكتب عشان انا اقوى منك .. انت ضعيف زيهمـ وعايز واحده زيهمـ ..
لا فالح .. مبروك خفيت يا كهل يا ابن امبارح ..
وجه الشبه ملعوب زى ما ملعوب فى الملامح ..
على ورقتى مفيش حوا تبقى فى قوة فكره
بصالك من كل اتجاه .. تبقى بصالك انت ..
بيبدأ يتريق بردو - نفس الاستفزاز -
لا فالح مبروك خفيت يا كهل يا ابن امبارح ..
وجه الشبه " ملعوب " متغير .. زى ما الملامح كمان متغيره ..
على ورقتى مفيش حوا أقوى من افكارى ..
لو فى حوا بصالك من كل اتجاه .. تبقى بصالك انت ..
مش بصالى انا ..
انا بالكتير اجتمع بيهمـ فى عنق زجاجه ..
انت فى مستنقع باصص لـ السما على مدار فيرساتك ..
اللهجه دى مجاتش من يومين على بيتاتهمـ
اى سطر من اول الواقع ضفره برقبة رابهمـ ..
انا بالكتير اجتمع بيهمـ " فى عنق زجاجه " قبل الخروج من الاختناق .. لـ حيز اوسع ..
ممكن نقول عن التراكات مثلا القديمه اللى الجوكر بيعتبرها غلطه ..
دى كانت بتجبره يلتقى بـ ناس مش فـ مستواه " الادبى "
ولما خرج .. انتهى الموضوع وعرف ان قلمه اكبر منهمـ
لكن انت يا احمد فى مستنقع .. باصص للسما .. مش شايف انك فى المستنقع ..
اللى هما بيكتبوه دا .. مجاش من خبرتهمـ القليله .. دا جه من تعليمـ الجوكر ليهمـ ..
اى سطر الجوكر كتبه من اول تراك " الواقع " ضفره برقبة رابهمـ كله ..
أنا الـ أنا اللى فيك .. وانا الـ أنا بشكل مطلق ..
متغالطش المنطق هنا عشان مش هـ راب بطولتك

تبعا لـ وصف فرويد ..
ان شخصية الانسان مكونه من ثلاث اقسامـ .. من بينها الانا والانا العليا ..
الانا : هى الشخصيه المعتدله بين الهو والانا العليا .. حيث يمكنها اشباع غرائزها ولكن تحت اطار عقلانى ..
اما الانا العليا : فـ هى بعيده تماما عن الغرائز واكثر تحفظ وعقلانيه ..
فـ هنا بيقول انا الـ أنا اللى فيكوا .. وأنا الانا بـ شكل مطلق .. يعنى أنا الـ أنا والـ الانا العليا ..
فـ يـ احمد متغالطش المنطق .. انت مش بطل .. مش هحكى حكايتك ..
أخر واحده تسألى مأكتملش ليه الحادك ..
ما انتى عارفه انى كـ جوكر .. وصلته لـ عصا الكتابه

هنا بيكلمـ الجمهور " انت اخر حد يسأل احمد .. ليه مكملش فـ الحاده .. واحنا عارفين ان الجوكر وصله لـ عصا الكتابه .. " عصا سيدنا موسى "
الناس مش قادره تأمن يعمل ايه موسى بـ عصايه .. !
هو معاه عصا الكتابه يعنى ربنا اداله معجزه .. فـ طبيعى يبقى مؤمن بربنا ..
لأن " هل النبى اللى ربنا مديله معجزه هيكفر بيه "
محدش يقولى بتشبهى ايه بـ ايه " استوعب وجه الشبه "
ظلمـ فراعنه ايه اللى شاغلك عن اسرائيل وضرب غزه
ما انت اهو والعجل فوق .. ايه الجديد ما الناس دى ساكته ..

" بيقول لـ احمد .. ظلمـ فـ مصر ايه اللى شاغلك عن اسرائيل وضرب غزه !
ما انت اهو .. والعجل فوق .. " ساجدين لعجل " السيسى يعنى grin emoticon
هتغير ايه ! ما هى الناس ساكته !
غنى ولا اتصور مع هاشتاج #القدس_لنا ..
العرب من كفرهمـ بقوا فى عرض شبه مأذنه
متقوليش على الاقل هنا بنشعل فتيل الثوره ..
.. امشوا .. نفس الحاجه .. حد نفخ لـ السيسى فـ شعره !!!

مكمل مع أحمد بردو .. روح غنى ولا حتى اتصور مع هاشتاج القدس لنا ..
دا العرب من كفرهمـ بقوا فـ عرض اى حاجه تحمسهمـ ..
متقوليش انك بتقاومـ فى مصر ما انت عملت امشوا ونفس الحاجه ..
فى حاجه حصلت للسيسى !
ليه مفيش اغانى ؟ لأ
ليه ؟ مفيش جمهور !
انت فاهم فكره فى جمله فى غنوه
ليه هكتبلك كل يومـ ؟

هنا بيكلمـ الناس اللى بتطلب منه كل شويه تراكـ .. وهما اصلا مش فاهمين ..
مفيش اغانى ؟ لأ مفيش .. ليه بقى معندكش جمهور ؟
لأ فى بس هو انت فاهمـ اللى سبق عشان اكتب جديد !
حاله من الزهق .. حتى روايتى اهملتها ..
على ارض سوق باعوا التراب بـ 6 اصفار ..

بنزف دهب ..
زهقت بقى منهمـ حتى الروايه اللى بكتبها اهملتها ..

على ارض السوق باعوا التراب بـ ملايين " صدر دينا بـ ست أصفار "
وانا بنزف دهب
بس عمرى ما اقول للكعبه رب حاميها
حابب أكفر سيئاتى تحت رجل فيلك ..
دول مش معجزه .. دى معجزه ..
مفيش مقارنة جوده ..
بس برغمـ الزهق واليأس .. مش هسيب الكتابه ليكوا واقول ليها رب بردو .
حابب أموت تحت رجل الفيل ..
هما مش معجزه .. لكن كتابتى معجزه ..
مفيش مقارنه بينا
الجوكريان الحقيقى .. شمس مستقبل الكوكب ..
المستمع الحقيقى .. هو شمس مستقبل الكوكب

كتبه :

أندرجراوند عربى هو موفع يهتم بكل فرق الاندرجراوند وأخر الأخبار وكلمات التراكات

لقراءة المزيد عننا :

ليست هناك تعليقات:

إرسال تعليق